Qida təhlükəsizliyi agentləri Göyçayda reyd keçirib

Qida Təhlükəsizliyi Agentliyi qida təhlükəsizliyinin təmin olunması və istehlakçı hüquqlarının müdafiəsi istiqamətində tədbirləri davam etdirir.

Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, nəzarət tədbirləri çərçivəsində Göyçay şəhəri, H.Əliyev prospektində fiziki şəxs Beydullayev Kənan Yaşar oğluna məxsus “MEGA” marketdə yoxlama aparılıb.

Yoxlama zamanı qida təhlükəsizliyi sahəsində texniki normativ-hüquqi aktların tələblərinin pozulduğu aşkar olunub. Marketin qida təhlükəsizliyi qeydiyyatına alınmadığı, mal qonşuluğu qaydalarına və temperatur rejiminə riayət edilmədiyi, işçi heyətin ilkin və dövri tibbi müayinədən keçmədiyi məlum olub. Həmçinin qablaşdırmasında etiket məlumatları olmayan konservləşdirilmiş turşu (50 ədəd 3 kiloqramlıq, 16 ədəd 1 kiloqramlıq) və yağ məhsulunun (1 ədəd 2 kiloqramlıq), Azərbaycan dilində markalanması olmayan kolbasa, sosiska, konservləşdirilmiş balıq və mal əti, xurma, uşaq qidası və s. məhsulların satışının həyata keçirildiyi müəyyən olunub.

Aşkar olunmuş faktlarla bağlı qanunvericiliyə uyğun müvafiq tədbirlər görülüb.

скачать dle 12.1