Qida Təhlükəsizliyi İnstitutu maarifləndirici mövzuda görüşlərini davam etdirir

Azərbaycan Qida Təhlükəsizliyi İnstitutunun (AQTİ) fəaliyyət istiqamətləri, eləcə də qida sahəsində ictimai məlumatlılığın artırılması ilə bağlı maarifləndirici görüşlər davam etdirilir. Həmin çərçivədə növbəti görüş Azərbaycan Respublikasının Prezidenti yanında Dövlət İdarəçilik Akademiyasında təhsil alan dövlət qulluqçuları üçün təşkil olunub.

İnstitutun İctimaiyyətlə əlaqələr və maarifləndirmə departamentindən verilən məlumata görə, görüşdə Qida Təhlükəsizliyi İnstitutunun fəaliyyəti barədə ətraflı məlumat verilərək bildirilib ki, hazırda institutun nəzdində qida təhlükəsizliyi, kompleks müayinələr, heyvan və bitki sağlamlığı üzrə ümumilikdə 16 laboratoriya və regional bölmə fəaliyyət göstərir.

Qurumun əsas məqsədi insanların həyat və sağlamlığının qorunması üçün qida təhlükəsizliyinin daha səmərəli təşkilini təmin etməkdir. Bu məqsədlə AQTİ-nin müasir infrastruktura malik laboratoriyalarında qida təhlükəsizliyi, heyvan və bitki sağlamlığı göstəriciləri üzrə elmi-praktiki araşdırmalar, tədqiqatlar aparılır, kompleks müayinələr, laborator analizlər və sınaq işləri həyata keçirilir.

Görüşdə ixtisaslı mütəxəssislərin formalaşdırılmasının və kadr potensialının peşəkarlıq səviyyəsinin artırılmasının vacibliyi vurğulanıb. Qeyd olunub ki, bu istiqamətdə təcrübə mübadilələrinə xüsusi diqqət yetirən AQTİ yüksəkixtisaslı kadrların qida təhlükəsizliyi sahəsində elmi-praktiki araşdırma və tədqiqat işləri aparmasına da kömək edir.

Görüş çərçivəsində Dövlət İdarəçilik Akademiyasında təhsil alan dövlət qulluqçuları institutun nəzdində fəaliyyət göstərən laboratoriyalara baxış keçirib, laboratoriyaların maddi-texniki bazası ilə yaxından tanış olublar. Həmçinin dövlət qulluqçularını maraqlandıran suallar cavablandırıb.скачать dle 12.1