Respublika Uşaq Kitabxanası yazıçı İmdat Avşarı qonaq etdi

F.Köçərli adına Respublika Uşaq Kitabxanasının həyata keçirdiyi tədbirlər çərçivəsində “Qonağım ol” rubrikasının qonağı yazıçı, tərcüməçi, şair, “Türk ədəbiyyatı” jurnalının baş redaktoru İmdat Avşar olacaq.

L

ayihənin həyata keçirilməsində məqsəd, oxucu və müəlliflər arasında virtual görüşlərin keçirilməsini təmin etmək, yazıçının yeni kitablarının oxuculara tanıdılmasına şərait yaratmaqla oxucuların intellektual səviyyəsinin inkişafında kitabxanaların rolunu qeyd etməkdir.

İmdat Avşar çağdaş Türkiyə ədəbiyyatında ədəbi-bədii və fəlsəfi-estetik fikrin formalaşmasında böyük və əvəzsiz xidmətləri olan yazardır. Azərbaycan ədəbi mühitində də İmdat Avşar imzası, peşəkar qələmi ilə tanınır və sevilir. İmdat bəyin çağdaş və klassik ədəbi ənənələrə söykənən zəngin nəsr yaradıcılığı vardır. Onun orijinal yazı tərzi, qeyri-adi ifadə forması, şeir kimi bənzərsiz təhkiyə yaratmaq qabiliyyəti, əsərlərinə məxsus psixoloji-fəlsəfi dərinlik və mövzu rəngarəngliyi bütün türk dünyasına tanışdır.

2012-ci ildə İmdat Avşarın “Anamın saatları” adlı Azərbaycan dilində ilk kitabı işıq üzü görüb. Bu günlərdə isə müəllifin “Göyərçin sevdası” adlı ana dilimizdə ikinci kitabı nəşrə hazırlanır.

Kitabda müəllifin “Xocalıda qalan tar”, “Kafa kağıdı”, “Göyərçin sevdası”, “Bitməyən roman”, “Durna çırağı”, “Söylənməmiş sözlər”, “İtmiş bahar nərgizi”, “Rehin” və digər hekayələri yer alıb. “Xocalıda qalan tar” hekayəsi İmdat bəyin “Qarabağ qaçqınları”ndan sonra Vətənsizlik nisgilimizi sözə çevirən ikinci hekayəsidir.

O, Mirzə Fətəlidən, Mirzə Cəlildən üzü bəri tərcümə edə-edə və bu gün sevə-sevə təbliğ edilən Azərbaycan ədəbiyyatının ən doğma və fədakar dostudur. Savaş günlərində isə yazdığı “Tanrı Türkü qorusun!” şeirində İmdat Avşar qələmi ilə Azərbaycan əsgərinin səngərində, bütün ürəyi ilə Qarabağda olduğunu göstərmiş olub.

“Qonağım ol” rubrikası əsasında reallaşacaq görüş çərçivəsində oxucular, canlı yayım üzərindən yazıçı ilə onlayn görüş, diskussiya aparmaq və həmsöhbət olmaq imkanı əldə edəcəklər. Yazar görüş zamanı həyat və fəaliyyəti, əsərləri haqqında ətraflı məlumat verəcək.

Onlayn görüş iyulun 23-də kitabxananın instaqram sosial şəbəkəsi üzərindən reallaşacaqскачать dle 12.1