TÜRKSOY Afrika qitəsində

Beynəlxalq Türk Mədəniyyəti Təşkilatının (TÜRKSOY) Baş katib Düsen Kaseinovun rəhbərlik etdiyi TÜRKSOY nümayəndə heyəti Konqo Demokratik Respublikasına səfər edib.

TÜRKSOY-un katibliyindən

verilən məlumata görə, səfərin məqsədi TÜRKSOY-Afrika Birliyi və TÜRKSOY-Konqo Demokratik Respublikası əməkdaşlığına dair, eyni zamanda Prezident Rəcəb Tayyib Ərdoğanın Sərəncamı ilə 2021-ci ilin Türkiyədə “Türk dili və Yunis Əmrə ili” elan edilməsi münasibətilə bu mövzuda rəsm sərgisinin hazırlanması istiqamətinə müzakirələr aparmaq və anlaşma memorandumları imzalamaq olub.

Məlumatda bildirilir ki, səmərəli başa çatan görüş çərçivəsində TÜRKSOY-Afrika Birliyi, TÜRKSOY-Konqo Demokratik Respublikası arasında əməkdaşlığa dair mühüm müzakirələr aparılıb.

Sonra TÜRKSOY ilə Konqo Demokratik Respublikasının Mədəniyyət, Sənət və İrs Nazirliyi arasında ikitərəfli əməkdaşlığa dair anlaşma imzalanıb.

Əminliklə ifadə olunub ki, TÜRKSOY ilə Konqo Demokratik Respublikası arasında sənədin imzalanmasından sonra, yaxın gələcəkdə Beynəlxalq Türk Mədəniyyəti Təşkilatı ilə Afrika Birliyi arasında imzalanacaq anlaşma memorandumu TÜRKSOY-un Afrika qitəsindən fəaliyyətinə əhəmiyyətli təsir göstərəcək. Vurğulanıb ki, münasibətlərin bu məcrada inkişafı Azərbaycan, Türkiyə, Qazaxıstan, Qırğızıstan, Özbəkistan və Türkmənistan başda olmaqla TÜRKSOY-la əməkdaşlıq və tərəfdaşlıq edən ölkələr və təşkilatların Afrika qitəsi ilə əməkdaşlığına böyük təkan verəcək.
скачать dle 12.1