"Qarabağ " cavab qarşılaşmasına hazırdır

Meydanda hər şeyə hazır olmalı, yaxşı nəticə qazanmaq üçün həddindən artıq güc sərf etməliyik. Demək olar ki, buna hazırıq.

Forpost.az

xəbər verir ki, bu sözləri UEFA Çempionlar Liqasının ikinci təsnifat mərhələsinin cavab oyunları çərçivəsində İsveçrənin "Sürix" komandasının qonağı olacaq Ağdamın "Qarabağ" klubunun baş məşqçisi Qurban Qurbanov matçdan əvvəl təşkil olunan mətbuat konfransında deyib.

Fərqli oyun nümayiş etdirən komandaya qarşı mübarizə aparacaqlarını deyən mütəxəssis bildirib: "Bu görüşə hazırlaşmaq üçün xeyli vaxtımız oldu. Amma bilirik ki, rəqib də bu matça ciddi hazırlaşıb. Çempionat oyunlarında bəzi əsas futbolçulara istirahət verilməsi də bunu deməyə əsas verir".

Q.Qurbanov heyətlə bağlı çox dəyişiklik etməyi xoşlamadığını vurğulayıb: "Güvəndiyim oyunçular var. İstənilən an hər bir futbolçunu düşünmədən əsas heyətdə oynada bilərəm. Həm də bəzi matçlar fərqli olur. Bəzən rotasiyalar edirsən. Sabah da xırda dəyişikliklər mümkündür".

"Rəqib futbolçu bu görüşün finala bərabər olduğunu deyib. Həqiqətən hər şeyə hazır olmalıyıq. Oyunun gedişatına uyğun qərarlar verməyə çalışmalıyıq. Çünki "Sürix" də ciddi rəqibdir. Amma çox istərdik ki, matçın taleyi ilk hissədə həll olunsun", - deyə baş məşqçi əlavə edib.

Qeyd edək ki, iyulun 27-də oynanılacaq "Sürix"-"Qarabağ" matçı Bakı vaxtı ilə saat 21:00-da başlayacaq. Bakıdakı ilk görüşdə Ağdam təmsilçisi 3:2 hesablı qələbə qazanıb.скачать dle 12.1