Bakı Dövlət Universitetinin (BDU) Tələbə Gənclər Təşkilatı (TGT) “Zərərli vərdişlərlə birgə mübarizə aparaq” mövzusunda maarifləndirici tədbir keçirib

BDU-dan bildirilib ki, TGT-nin Biologiya fakültəsi üzrə sədri Nigar Hüseynova tütün məmulatlarının insan sağlamlığına vurduğu zərərlərdən danışıb. Bu zərərli vərdişə aludə olanlar arasında yeniyetmə və gənclərin üstünlük təşkil etdiyini deyən N.Hüseynova bildirib ki, tütünün zərərli təsiri illər sonra - nikotinin kumulyativ effekti özünü göstərdikdə hiss edilir.

Araşdırmalara görə, 30 yaşadək siqaretdən uzaqlaşanların ömürləri təxminən 10 il uzanır. Tütün məmulatlarından asılılıq tibbi-sosial problemdir. Bunun üçün həm tibbi, həm də sosial tədbirlər görülməlidir. Siqaretdən istifadəyə qarşı mübarizə üçün sağlam həyat tərzi təbliğ edilməlidir. Mediada, sosial şəbəkələrdə tütün məmulatlarının zərərindən bəhs edən videoçarxlar nümayiş olunmalıdır. Valideynlər öz övladlarına onun zərərlərini başa salmalıdırlar. Tütünə qarşı mübarizədə xüsusilə səhiyyə orqanlarının üzərinə böyük vəzifə düşür. Hazırda tütün məmulatları ilə mübarizə mərkəzləri də fəaliyyət göstərir.

Terapevt Günay Allahverdiyeva isə tələbələrə siqaret, narkotik vasitələr və alkoqolun fəsadları barədə məlumat verib. O vurğulayıb ki, hər il tütünün törətdiyi xəstəliklər nəticəsində dünyada altı milyonadək insan vəfat edir. Yanan siqaret 4 mindən çox müxtəlif kimyəvi birləşmə, o cümlədən 40-dan çox kanserogen maddə istehsal edir. Siqaret ağciyər xərçəngi başda olmaqla, nəfəs yollarının xroniki xəstəlikləri, ürək-damar xəstəlikləri, düz bağırsaq, uşaqlıq, böyrək, mədəaltı vəzi, öd kisəsi, qida borusu, qırtlaq, ağız boşluğu, udlaq və mədə xərçəngi xəstəliklərinin yaranma riskini artırır. Əksər siqaret çəkən insanların həyatı 15-20 ilədək qısalır.

Sonda tələbələr məruzəçilərə suallar ünvanlayıb və mövzu ətrafında müzakirələr aparılıb.скачать dle 12.1